تعليق مؤثر من ناصر ماهر بعد رحيله عن الزمالك

23 يناير، 2026

48 دقيقة واحدة

حرص ناصر ماهر، لاعب الزمالك السابق والمنتقل حديثًا إلى صفوف نادي بيراميدز، على توجيه رسالة مؤثرة لجماهير القلعة البيضاء عقب انتهاء رحلته مع الفريق.

وكتب ناصر عبر حسابه الرسمي على "إنستجرام": "مش عارف أبدأ منين، لأن في حاجات صعب تتقال، خصوصًا لما تكون بتتكلم لجمهور عظيم زي جماهير الزمالك داخل القارة وخارجها. اسمحولي أعبر عن حبي واحترامي ليكم.. والله مش مجرد كلام".

وتابع ناصر: "من أول يوم دخلت فيه النادي وأنا حاسس إن المكان ده فيه حاجة تتحب، يمكن عشان ده كيان كبير، أو لاعبين كبار وشخصيات محترمة، أو عشان الجمهور المختلف بأجوائه ودعمه، لكن في النهاية كرة القدم ممكن تخليك تسيب مكان بتحبه، وده جزء من اللعبة، وأنا بحبكم جدًا والله".

وأضاف: "النهارده آخر يوم ليا في نادي الزمالك، النادي اللي تشرفت ألبس تيشيرته التاريخي ودافعت عنه بكل إخلاص وحب. أنتم خلتوني نجم بجد، ودائمًا بقول إن ربنا أكرمني بجمهور الزمالك".

وعن الأسباب، أشار ناصر: "يمكن الرحلة خلصت دلوقتي بسبب ظروف النادي المالية، وأتمنى أكون جزء ولو بسيط في حل الأزمة المالية، وأقدر أساعد النادي. الزمالك كبير ويستحق إن الواحد يضحي عشانه، وبالنسبة لي الرحلة لسه فيها فصل تاني.. إمتى؟ الله أعلم".

واختتم رسالته بالشكر لكل من ساعده خلال رحلته "بشكر كل زملائي اللاعبين، وبشكر إدارة نادي الزمالك برئاسة الكابتن حسين لبيب، وكل المدربين اللي اتدربت معاهم: شكرًا جون أدوار، شكرًا كابتن عبد الناصر محمد، شكرًا كابتن أحمد سليمان. وكمان بشكر جمهور الزمالك العظيم الداعم الأول للنادي. دخلت النادي وقلت أنا بحب الزمالك، ودلوقتي وأنا ماشي بقول هفضل أحب الزمالك".