محمد صلاح يطلق تصريح مدوي ومفاجئ بعد التأهل لنصف النهائي ويمازح حسام حسن بشأن المحترفين

عبّر محمد صلاح، قائد منتخب مصر، عن سعادته الكبيرة وفخره بزملائه عقب الفوز التاريخي على كوت ديفوار والتأهل إلى نصف نهائي كأس الأمم الإفريقية 2025، مؤكدًا أن الأجواء داخل المعسكر الحالي تُعد الأفضل في مسيرته الدولية.
وقال محمد صلاح خلال المؤتمر الصحفي عقب اللقاء إن شعوره بالفخر لا يوصف، موضحًا:
أنا فخور إني لعبت مع اللعيبة دي، كلنا عايزين نعمل حاجة لبلدنا، وكلهم عايزين يلعبوا ويفرحوا الجمهور.
وأضاف قائد الفراعنة أن التركيز حاليًا منصب فقط على المباراة المقبلة، دون التفكير فيما بعدها، مشددًا:
أتمنى الماتش الجاي ربنا يوفقنا ونكسب بإذن الله، وبعدين نفكر في اللي بعده.
وتحدث صلاح عن الأجواء داخل معسكر منتخب مصر، مؤكدًا أنها استثنائية بكل المقاييس، وقال:
المعسكر ده كله لو اتصور، بجد أحسن معسكر عيشته في حياتي، كلنا قريبين من بعض وبنحب بعض.
وأشار نجم ليفربول إلى طموحه الشخصي في التتويج باللقب الإفريقي، مؤكدًا تحمله الكامل للضغوط من أجل زملائه، وقال:
أنا أكتر واحد عايز يكسب اللقب ده، أنا كسبت كل حاجة إلا اللقب ده، بس الضغط على اللعيبة مش هيؤدي لحاجة، سبوني أنا شايل الضغط ده.
وتطرق صلاح للحديث عن الفارق بين المنتخبات المشاركة، موضحًا أن المنافسة صعبة للغاية، وأضاف:
إنت بتلاعب منتخبات كلها محترفين فعلاً، وشوف كل اللعيبة بتلعب فين، إحنا لعيبتنا محترمين ورجالة، بس قوام المنتخب من الدوري المصري.
واختتم تصريحاته بروح من الدعابة، قائلًا:
من ساعة ما كابتن حسام حسن قال المنتخب فيه محترفين اتنين وربع، وإحنا مبقيناش تلاتة أربعة.
كما وجه محمد صلاح الشكر للمغرب على التنظيم، مؤكدًا سعادته الكبيرة بالتواجد هناك، وقال:
أنا مبسوط إني هنا ومع اللعيبة دي والجهاز الفني ده، وبشكر المغرب على التنظيم والأجواء، كل شيء روعة بصراحة، ودي من أحلى المعسكرات اللي عيشتها.